Ракометната репрезентација на Франција ја одбрани титулата светски шампион откако во финалето на 25. Светско првенство вечерва во Париз ја победи Норвешка со 33:26 (18:17). 
За „триколорите“ ова е шеста титула светски првак, воедно тие ја одбранија титулата освоена пред две години во Катар. Досега Франција првото место го освојуваше на Светските првенства: 1995, 2001, 2009, 2011 и 2015 година.
За Норвешка пласманот во финалето е најголем успех на Светските првенства освојувајќи го второто место. Во финалето Норвешка подобро играше во првото полувреме кога имаше и водство од три голови разлика во два наврати (10:7 и 14:11), но на крајот на првиот дел Франција поведе со 18:17.
Во второто полувреме Франција доминираше на теренот и постојано го зголемуваше водство и во 53.та минута беше +8 за Франција (31:23), а до крајот на дуелот Норвешка само го ублажи поразот.
Најефикасен играч на финалето беше Никола Карабатиќ со 6 голови.
Во „малото финале“ вчера Словенија ја победи Хрватска со 31:30 и го освои првиот медал на Светските првенства.
Следното Светско првенство ќе се одржи по две години во Данска и Германија.