Невино ракување меѓу германската министерка за животна средина Барбара Хендрикс и потпретседателката на Иран Масумех Ебтекар предизвика бурно незадоволство во иранските медиуми и социјални мрежи, кои помислиле дека кусо потстрижената министерка е маж, објави ДПА.
Државната иранска телевизија ИРИБ објави кадри од средбата на Хендрикс и Ебтекар во Берлин, при што двете жени си подаваат рака. Со кратката фризура, кошула и темно сако, германската министерка им изгледала на иранските гледачи како маж, а ракување со мажи надвор семејниот круг е строго табу за муслиманките во Иран. Такво нешто би можело да ја чини функција Ебтекар, која е и шеф на иранската агенција за заштита на животната средина.
Според иранската новинска агенција Тасним за забуната придонеле репортажата и кадрите, објавени од ИРИБ.
Студиото на државната телевизија во Берлин информира дека во репортажа не се вели дека иранската вицепретседателка се ракувала со маж и тоа не носи одговорност за погрешните толкувања на кадрите.