Кинеските научници тврдат дека ние никогаш нема да го искорениме целосно коронавирусот, придружувајќи се на се поголем број меѓународни експерти кои велат дека вирусот ќе се враќа сезонски, како што е грипот.
Како што пренесува Блумберг, тие тврдат дека е малку веројатно дека коронавирусот ќе исчезне онака како што исчезна нејзиниот „постар брат“ САРС пред 17 години, бидејќи се пренесува меѓу луѓето, без да предизвика воопшто симптоми. Токму оваа група асимптоматски пациенти прави сузбивањето на на епидемијата да биде многу тешко, изјавија кинеските научници на брифингот во Пекинг.
Кај САРС, заразените имаа сериозни симптоми. Откако биле ставени во карантин, болеста престанала да се шири. Спротивно на тоа, сè повеќе асимптоматски случаи на коронавирус продолжуваат да се појавуваат во Кина, иако епидемијата е ставена под контрола.
„Ова ќе биде епидемија со која ќе живееме многу долго и веројатно ќе се појавува сезонски“, рече Џин Ки од кинеската академија за медицински науки.
Меѓу научниците ширум светот се појавува консензус дека ќе биде многу тешко целосно да се уништи вирусот, и покрај строгите мерки и карантини ширум светот кои ја запреа економијата. Некои дури повикуваат вирусот да се шири на контролиран начин кај помладата популација за да се добие „имунитет на стадата“, додека некои, како што е Шведска, одбиваат да воведат строги мерки и карантини.
И американскиот стручњак Ентони Фаучи вели дека коронавирусот најверојатно ќе се врати сезонски.
Кинеските научници исто така велат дека нема докази дека заразата ќе забави во текот на летото.
„Вирусот е чувствителен на топлина, но само кога е изложен на температура од 56 степени Целзиусови повеќе од 30 минути. Времето нема да стане толку топло. Глобално, шансите бројот на заразени драстично да се намалат во текот на летото се многу мали”, вели Ванг Гуаџианг, шеф на одделот за инфективни болести при Универзитетската болница во Пекинг.