Претседателката на Европската централна банка (ЕЦБ), Кристин Лагард денеска во Европскиот парламент изјави дека не е убедена оти инфлацијата го достигнала врвот откако ги премина највисоките регистрирани нивоа во еврозоната.
Лагард, исто така, им рече на европратениците дека ЕЦБ не завршила со зголемувањето на каматните стапки со цел да се ублажат ефектите од растот на цените.
Според неа, има преголема неизвесност за да се знае дали инфлацијата, која во октомври изнесуваше 10,6 отсто, наскоро ќе падне во 19-те земји кои го користат еврото.
Кога ќе погледнете што ги зголемува цените, „без разлика дали се работи за храна или производи за широка потрошувачка или енергија, ние не ги гледаме компонентите или насоката што би ме навела да верувам дека го достигнавме врвот на инфлаторните движења и дека инфлацијата наскоро ќе се намали“, рече Лагард.
Тоа, според неа, значи дека ЕЦБ „ќе продолжи да ја скротува инфлацијата со сите алатки со кои располага“, пред се преку зголемување на каматната стапка, додаде таа во обраќањето пред Комитетот за економски и монетарни прашања на Европскиот Парламент.
По третото големо зголемување на каматните стапки во октомври, најбрзото темпо на зголемување на каматните стапки некогаш забележано, ЕЦБ, рече Лагард, очекува „понатамошно да ги зголеми стапките, на потребното ниво за да се осигура дека инфлацијата ќе се врати во догледно време на среднорочно проектираниот процент од два отсто“.
ЕЦБ им се придружи на Федералните резерви на САД и другите централни банки ширум светот во брзото зголемување на каматните стапки за да ја ограничи инфлацијата што дивее додека глобалната економија прво закрепнува од пандемијата „Ковид-19“, а потоа се влошува од руската инвазија на Украина, разрушена од војна.
Централните банки ризикуваат да ги втурнат националните економии во рецесија додека светот се бори со енергетска криза, зголемување на цените на храната и слабеење на валутите во однос на доларот.