Министерот за правда, Кренар Лога денеска одржал средба во Департментот за правда на САД, со високи претставници на чело со заменик-помошникот јавен обвинител и советник за меѓународни односи, Брус Ц. Сварц.
Од ресорот што го предводи, соопштија дека изразил благодарност за придонесот и инвестициите на САД низ годините за правосудниот систем и стратешкото партнерство меѓу двете земји.
-Разговаравме за реформите во правосудството, стратегијата 2023-2027 година, уставните измени и нивното значење за евроатлантската иднина на државата, новиот Кривичен законик, рокот за избор на републички обвинител, системот за распределба на предметите во правосудството – АКМИС. Ги информирав домаќините и за системот и состојбата на затворите во земјава, како и за предложениот закон за амнестија. Билатералната соработка со САД мора да продолжи и да се продлабочува бидејќи за РСМ оваа соработка имала и има витално значење за иднината на граѓаните, изјавил Лога на средбата.