Народното собрание на Република Српска синоќа усвои предлог-одлука за пристапување кон усвојување на нов Устав на Република Српска, јави РТРС.
За одлуката гласаа 50 пратеници, седум беа против, а двајца воздржани.
Претседателот на Собранието на РС, Ненад Стевандиќ, најави дека денеска во 10 часот ќе започне 20-та посебна седница, на која, на предлог на претседателот на РС Милорад Додик, ќе се разгледуваат Предлог-уставот и предлог-законот за заштита на уставниот поредок на РС.
„Со донесувањето на одлуката, Комисијата за уставни прашања е должна во најкраток можен рок да го подготви текстот на Предлог-уставот и да го достави до Собранието“, информираат од РТРС.
Премиерот на Република Српска, Радован Вишковиќ, изјави дека новиот Устав ќе биде во согласност со Дејтонскиот мировен договор и дека институциите на РС се подготвени да разговараат со претставниците на бошњачкиот и хрватскиот народ.
„Господа, не пропуштајте го овој историски момент. Република Српска има право да одлучува за новиот Устав“, изјави Вишковиќ за време на парламентарната расправа.
Тој истакна дека нема проблем да се задржат Советот на народите и потпретседателите на Република Српска, но дека не смее да има простор за злоупотреби.
„Досега сме имале само злоупотреби. Некој кој себеси се нарекува потпретседател на Република Српска, без разлика од која нација доаѓа, мора да ги штити интересите на Република Српска“, нагласи Вишковиќ.
Со оваа одлука започнува процесот на донесување на новиот Устав, кој ќе ја дефинира идната правна рамка на Република Српска.