Кинескиот претседател Си Џинпинг денеска повторно се појави на државната телевизија по неколкудневно отсуство од јавноста, што предизвика гласини за политичката стабилност на 69-годишниот кинески лидер.
Си беше прикажан на телевизија за време на посетата на изложбата наречена „Прославување на напредокот во нова ера“ на саемот во Пекинг, пренесува АП.
Придружуван од премиерот Ли Кечијанг и други високи кинески лидери, Си, кој е и шеф на владејачката Комунистичка партија и врховен командант на Народноослободителната армија, гледаше некои презентации и коментираше за економскиот напредок на Кина во изминатата деценија.
Посетата на изложбата беше прво телевизиско појавување на Си откако се врати од регионалниот самит во Узбекистан минатиот викенд.
Според прописите за пандемијата на Кина, тој ќе мора да остане во карантин една недела по враќањето (од странство).
АП потсетува дека нетранспарентниот систем на Кина често го поттикнува ширењето гласини за политички конфликти или обиди за пуч, и покрај стабилната природа на авторитарната, централизирана држава која безмилосно се справува со сите неистомисленици.
Агенцијата наведува и дека Си се смета за најмоќниот кинески лидер во последните неколку децении, дека нема познати активни политички ривали и дека ги отстранил уставните ограничувања кои му дозволуваат да владее доживотно ако сака.