САД и Европската унија во неделата објавија крај на спорот околу царините наметнати во 2018 година за челик и алуминиум, велејќи дека ќе се обидат да постигнат глобален договор за одржливо производство на двата метали во следните две години.
САД и ЕУ направија големи чекори кои ќе ја решат егзистенцијалната закана од климатските промени додека ги штитат американските бизниси и индустријата, рече американскиот претседател Џо Бајден.
Истакна дека договорот веднаш ги отстранува царините за челик и алуминиум од ЕУ воведени од претходната влада на Доналд Трамп. Ова ќе ги намали трошоците за американските потрошувачи, нагласи демократот.
Бајден посочи дека договорот меѓу Вашингтон и Брисел ќе го ограничи увозот на нечист челик на американскиот пазар, мислејќи на начинот на неговото производство што е штетен за животната средина.
Договорот меѓу двете страни на Атлантикот ќе се спротивстави и на дампингот на Кина и другите земји.
„Задоволство ми е што можам да објавам дека претседателот Бајден и јас постигнавме договор за укинување на царините за челик и алуминиум и дека ќе работиме заедно на нов Светски договор за одржлив челик“, рече претседателката на Европската комисија Урсула фон дер Лајен во заедничката изјава.
Трговскиот спор за челик и алуминиум беше инициран во 2018 година од тогашниот американски претседател Трамп со воведување специјални царини за тие метали.
ЕУ одговори на царините за американските производи како фармерки, виски, мотоцикли и путер од кикирики.
Трамп тогаш ги оправда специјалните царини со „национални безбедносни интереси“.
ЕУ не го сметаше ова образложение за веродостојно и претпоставува дека целта е да се заштити американската економија од несакана конкуренција.