Администрацијата на американскиот претседател Џо Бајден и претставниците на американските разузнавачки служби се загрижени дека Израел планира копнена инвазија на Либан која би можела да започне кон крајот на пролетта или почетокот на летото, доколку либанската милитантна група Хезболах не биде принудена да се повлече од границата со Израел преку дипломатски канали.
Повикувајќи се на неименувани функционери од администрацијата и разузнавачки извори, Си-Ен-Ен објави дека толку често се зборува за потенцијалната копнена инвазија на израелската армија во Либан што се споменува на официјалните брифинзи на персоналот на администрацијата.
„Работиме под претпоставка дека во наредните месеци ќе се случи израелска воена операција. Не во следните недели, туку подоцна оваа пролет“, рече еден претставник на администрацијата на Бајден.
Додека САД се клучен посредник во тековните разговори за прекин на огнот во Појасот Газа, администрацијата на Бајден, исто така, одржа паралелни разговори со израелските и либанските претставници за создавање тампон зона во јужниот дел на Либан, која ќе пропадне во случај на израелски напад врз Либан.
„Мислам дека она што Израел го прави е дека ја упатуваат оваа закана со надеж дека ќе има договор. Некои израелски официјални лица сугерираат дека тоа е повеќе обид за закана што тие можат да ја искористат. Другите повеќе зборуваат за тоа како воена потреба што ќе се случи“, рече претставникот.
Друг висок претставник на администрацијата на Бајден рече дека има елементи во израелската влада и војска кои го поддржале нападот.
„Постои сè поголема група која вели – ајде да пробаме. Секој упад може да доведе до голема, голема ескалација, чии размери не можеме да ги замислиме“, рече тој.