Финансиските проблеми не ја спречија Барселона ова лето да биде меѓу најактивните тимови на трансфер пазарот. Таму веќе привлекоа сериозни имиња како Роберт Левандовски, Франк Кеси, Рафиња, Андреас Кристенсен, а се очекува да бидат привлечени уште најмалку двајца играчи кои ќе ја засилат конкуренцијата во одбраната.
Освен тоа, Каталонците се обидуваат да се разделат со еден куп играчи кои нема да бидат потребни во текот на претстојната кампања. Една од сагите е можното заминување на Френки де Јонг, кој е многу посакуван од Манчестер Јунајтед, но во последните денови активно се поврзува со Челси. Друг играч кој бара нов тим е Мемфис Депај, но и двајцата немаат желба да го напуштат „Камп Ноу“ и претпочитаат да останат.
Токму тоа се надеваат дека ќе го променат од раководството на тимот.
Весникот „Спорт“ пренесува дека Чави, кој конечно успеал да пристигне во тимот во САД, одржал состанок со шефовите на тимот, на кој разговарале токму за оваа страна на прашањето. Медиумите додаваат дека очекувањата се во наредните денови тренерот да седне и да води длабинска дискусија за ситуацијата со двајцата играчи, при што двете страни ќе ги разјаснат своите позиции. Шефовите се надеваат дека со цврст став и јасни укажувања, Чави ќе може појасно да им покаже на двајцата Холанѓани дека е најдобро да престанат да опстојуваат на цврстиот став и да го напуштат „Камп Ноу“.
Барселона веќе неколку недели е во договор со Манчестер Јунајтед за трансфер на Френки де Јонг, но играчот од средниот ред одбива да ја прифати понудата на „црвените ѓаволи“. Интерес има и за Мемфис Депај и голем број тимови продолжуваат да ја следат ситуацијата околу играчот.