Турскиот министер за правда Бекир Боздаг изјави денеска дека прашањето поврзано со нацрт-законот за раните бракови „засега се затвора“.
Владата денеска ја отстрани спорната одредба од нацрт-законот, која се однесува и на сексуалните злосторства врз децата.
– Доколку политичките партии постигнат широк консензус по ова прашање во иднина, тогаш тоа ќе може да биде вратено на дневен ред, но засега прашањето е затворено, рече Боздаг, кој зборуваше во Парламентот.
Министерот за правда изјави дека Владата не успеала добро да ја појасни содржината на нацрт-законот.
– Всушнот нацрт-законот не ги вклучуваше силувачите, не успеавме тоа добро да го појасниме. Поради реакциите на луѓето ја отстрануваме таа одредба, рече Боздаг.
Со нацрт-законот се предвидуваше во одредени случаи да има укинување на пресуда кон лице, осудено за сексуален напад врз малолетничка, доколку извршителот склучи брак со жртвата.
Владејачката Партија на правдата и развојот (АКП) вчера објави дека го повлекува нацрт-законот со цел да бидат извршени дополнителни консултации во врска со него./MИА