Американската амбасадорка во земјава Анџела Агелер денеска сподели дека пристигнат е тим од Вашингтон кој поагресивно ќе истражува корупција кај бивши и сегашни функционери.
-Тимот за санкции од Вашингтон е тука за поагресивен поглед на минатите и сегашните корумпирани актери и да ги разгледа сите можни одговори. На правосудниот сектор во Северна Македонија му требаат повеќе истраги, гонење за да се покаже дека никој не е над законот, објави Агелер на Твитер.
Sanctions Team from Washington here to take a more aggressive look at past and current corrupt actors, and to consider all possible responses. North Macedonia’s justice sector needs more investigations, prosecutions to show that no one is above the law.
— Ambassador Angela Aggeler (@USAmbNMacedonia) December 6, 2022
Агелер пред неколку дена на настан по повод одбележувањето на 30 – годишнината од партнерството на УСАИД – Американска агенција за меѓународен развој со Северна Македонија, изјави дека корупцијата продолжува да го кочи напредокот на земјава.
Слична изјава вчера имаше и амбасадорката на Германија во земјава, Анке Холштајн.
-Напредокот на Северна Македонија на патот кон Европската Унија ќе зависи во голема мера и од успешното сузбивање на корупцијата, има многу работи кои треба да се направат, но ја имате нашата поддршка, рече Холштајн.
Министерството за финансии на САД на 11-ти април годинава објави листа на санкционирани лица и ентитети од Западен Балкан, на која се ставени и поранешниот премиер Никола Груевски и екс шефот на УБК Сашо Мијалков.
-САД и партнерите, како што е Обединетото Кралство, бараат одговорност од оние кои ја загрозуваат стабилноста, напредокот и европската интеграција на регионот, напиша тогаш на Твитер, американскиот државен секретар Антони Блинкен.