Од СДСМ денеска информираа дека партиската комисија прифатила три од четирите кандидатури за лидер на партијата. Одбиена е кандидатурата на членот од општинската организација во Куманово, Властимир Алексовски.
-Денеска согласно правилата заседаваше Централната изборна комисија и одлучија дека три кандидатури се целосни со сите потребни документи и услови согласно правилата и условите кои беа распишани, а една кандидатура не е и таа е отфрлена со одлука на Централната изборна комисија и кандидатот кој ја поднесе е известен за тоа, информира пратеничката од владеачката партија, Славјанка Петровска.
Ова значи дека верификацијата ја поминале Димитар Ковачевски, Фросина Ременски и Јован Деспотовски.
Покрај кандидатурите, тројцата сега ќе имаат 8 дена да ја претстават својата програма пред општинските организации на СДСМ.