Македонскиот ракометен клуб Вардар, кој ја покори Европа во 2017 и 2019 година, не можеше да се спаси од ускратување на правата за настап на клупските натпреварувања под покровителство на ЕХФ. Извршниот комитет на ЕХФ денеска само констатира дека скопските „црвено-црни“ не ги исполнуваат критериумите за учество, поради долгови кон поранешните и сегашните играчи.
„Одлуката на Извршниот комитет на ЕХФ следува по период од речиси две години во кој ЕХФ се обиде да го реши проблемот со неисплатата на платите на играчи од страна на клубот и со тоа да го задржи клубот од Скопје на највисоко ниво. Бидејќи Вардар реши активно да го презентира својот став пред медиумите, Европската ракометна федерација реши да даде јавен одговор. Овој одговор се доставува директно до клубот во исто време. Европските натпреварувања на клупско ниво имаат многу чувствителна структура и многу зависат од интегритетот на клубовите учесници. За да се расчистат сите работи со Вардар, имаше доста писмена комуникација, па дури и лични разговори и јасни рокови беа дадени од ЕХФ“, стои во соопштението на ЕХФ.
Во продолжението на отвореното писмо до јавноста се нагласува изгубеното трпение кон челниците на клубот кој некогаш беше поддржан од руски пари и носеше ракометни имиња, а сега не може да ја валоризира двојната круна од минатата сезона и директниот пласман во Лигата на шампионите.
„За жал, претставниците на клубот не можеа да ги почитуваат овие датуми и да дадат стратегија на одложување или плаќање. Плаќањата беа извршени само делумно, а имаше неколку обиди да се одложат термините за следната сезона. Извршниот комитет на седницата минатиот петок едногласно констатира дека Вардар не ги исполнил договорените задачи, ниту навреме ги извршил плаќањата и со тоа не ги исполнува критериумите за учество во европските купови во сезоната 22/23. Депозитот од сметката на ЕХФ е веќе префрлен на сметката на клубот и дополнително ќе се следи трансферот на преостанатите средства кои клубот треба да ги добие. Европската ракометна федерација жали што беше неопходно да се преземе таков чекор и посочува дека тоа не е во интерес на федерацијата, туку дека ситуацијата предизвикана од поранешниот клуб резултираше со дефицити кои не треба да го покриваат само новиот клуб. “ објасни ЕХФ.
Не помогна ниту интервенцијата на Ракометната федерација на Македонија, па на вардарци им останува само да се надеваат на чудо во вид на прифаќање на најавената судска жалба и укинување на драконската одлука. Инаку, веројатно е егзодусот на првотимците и заминувањето на шпанскиот селектор Давид Дејвис.
Во меѓувреме, словенечкиот и хрватскиот шампион Целје или Загреб се надеваат на специјална покана за Лигата на шампионите.