Хрватска има околу 250.000 зависници од алкохол, што ја прави една од првите пет земји во Европската унија (ЕУ) во однос на потрошувачката на алкохолни пијалоци.
Според податоците на Хрватскиот завод за јавно здравје, кои ги пренесува Хина, оваа зависност е голем социјален проблем бидејќи го зафаќа целото семејство, а само еден од осум зависници завршува на лекување.
Традиционално, меѓу мажите има повеќе зависници од алкохол, кои се обидуваат да ги решат проблемите со депресија, паника или стрес со пиење, бидејќи поради културни причини се двоумат да примат и да побараат помош, изјави психијатарот Крешимир Радиќ, специјалист од Клиника за психијатрија.
Тој истакна дека мажите умираат три пати почесто од болести поврзани со алкохол и, иако тие го сочинуваат најголемиот дел од лекуваните пациенти, сепак многу од нив не успеваат да добијат помош.
Консумацијата на алкохол рано во животот доведува до здравствени проблеми, па луѓето од сите возрасти се во програми за лекување во здравствените установи.
Алкохолизмот влијае на менталното здравје на целото семејство, кое страда социјално и психички поради членот кој пие.
Децата имаат полош успех на училиште, сопружниците имаат проблеми со функционирањето во работната средина, семејството е оптоварено со трошоци поради купување алкохол, поради сообраќајни казни и други прекршоци, што дополнително го осиромашува и го отежнува секојдневието.
„Во такви семејства семејното насилство не е реткост. Лекарите често се среќаваат со ситуации кога семејството повеќе не сака да има контакт со својот болен член кој пие, а тој е неспособен, со лошо физичко здравје и не може сам да се грижи“, вели Радиќ.