Премиерот Никола Груевски потврди дека со неговиот коалициски партнер, лидерот на ДУИ Али Ахмети разговарале за вклучување на ФБИ во случајот „Монструм“, во кој шестмина се осудени на казна доживотен затвор за петкратното убиство кај Смилковско Езеро. Но, според Груевски одлуката за евентуалното ангажирање на американското федерално биро за истраги е во рацете на Апелациониот суд. Единствено тој може да го повика ФБИ да биде дел од меѓународна експертиза на судскиот процес, вели премиерот Груевски.
„ Но, сепак, тоа е работа на судот, во случајот на Апелациониот, и негова и само негова може да биде одлуката дали ќе повика некој да дојде, а пак тој што ќе биде повикан, негова ќе биде одлуката дали ќе прифати. “
За прашањата околу престрелката во Кондово меѓу активисти на истата партија порача да се адресираат до Министерството за внатрешни работи. Тој не сакаше да го коментира инцидентот во кој било пукано и од службено оружје на вработен во МВР и имаше многумина со прострелни рани
„Не можам да ги коментирам, не ги знам деталите, тоа е работа на МВР, ве упатувам таму, се надевам дека тие брзо ќе ги расчистат сите работи и ќе ви дадат детални информации за она што вие го барате.“
Иако премиерот одбива да коментира, ова е опасен преседан , затоа што повторно се промовира водење на политика со оружје и со убивање .
Опасно е што станува збор за фронтмени, нивни поддржувачи од институциите на државата кои се и биле платени од Владата,или случувања на колиционен партнер на владата, партија во која МВР нема ингеренции!