По повод Денот на македонскиот јазик, Амбасадата на САД во Северна Македонија објави видео на социјалните мрежи во кое амбасадорката Анџела Агелер и вработените во амбасадата изразуваат почит кон македонскиот јазик и култура.
„Среќен Ден на македонскиот јазик! Дали знаевте дека некои американски дипломати учат македонски јазик пред да дојдат во Скопје?“ – порача Агелер во видеото, потенцирајќи го значењето на јазикот како дел од националниот идентитет.
Во видеото се појавуваат вработени од амбасадата и волонтери од Мировниот корпус на САД, кои на македонски јазик изговараат познати народни поговорки. Меѓу нив се: „Кој рано рани, две среќи граби“, „Што ќе посееш, тоа ќе жнееш“, „Двапати помисли, еднаш прозбори“, „Далеку оди, но и за дома мисли“, „Без мака, нема наука“, „Виното и ракијата немаат нозе, ама по нозе маваат“, и „Трпение — спасение“.
Со оваа иницијатива, американската амбасада уште еднаш покажа посветеност кон меѓукултурната размена и поддршката на македонската културна традиција.