Азербејџан има намера да дозволи група експерти од Обединетите нации да го посетат Нагорно Карабах „за неколку дена“, соопшти во петокот кабинетот на советникот на претседателот на Азербејџан.
Медиумите исто така ќе имаат можност да го посетат Нагорно Карабах, се вели во соопштението.
Речиси 90.000 Ерменци, од вкупно 120.000 жители, побегнале од тој регион по молскавична воена офанзива на Азербејџан.
Соединетите Држави и други го повикаа Баку да дозволи меѓународни набљудувачи да влезат во Нагорно-Карабах поради загриженоста за можни прекршувања на човековите права.
Ерменија го обвини Азербејџан за етничко чистење на Ерменците во Нагорно Карабах, што Баку силно го негира.
Азербејџанскиот претседател Илхам Алиев изјави дека правата на Ерменците од Карабах ќе бидат целосно почитувани, но дека поради неговата „железна тупаница“ идејата за независен етнички ерменски Карабах стана историја.
Алиев во телефонски разговор во вторникот на американскиот државен секретар Антони Блинкен му рекол дека неговите сили целеле само „воени објекти за време на антитерористичките мерки кои траеле помалку од 24 часа, а ниту еден цивил не бил повреден“, се вели во соопштението од кабинетот на азербејџанскиот претседател.
Азербејџанската војска уапси поранешен командант на сепаратистичката армија на Нагорно-Карабах на граничен премин со Ерменија, објави во петокот руската државна новинска агенција ТАСС, цитирајќи извор близок до командантот.
Според ТАСС, командантот Левон Мнацаканијан ја предводел армијата на самопрогласената Република Арцах од 2015 до 2018 година.