Европската агенција за лекови (ЕМА) денес објави дека го разгледува барањето за употреба на лекот за артритис „кинерет“ за третман на ковид-19 кај возрасни пациенти со пневмонија, и кај кои постои ризик од развој на тешка респираторна инсуфициенција.
Во соопштението ЕМА рече дека ќе ги анализира резултатите од две тековни клинички студии кои ја испитуваат безбедноста и ефикасноста на лекот кај пациенти хоспитализирани со ковид-19, пренесува „Ројтерс“.
Лекот „кинерет“ е моментално одобрен за третман на голем број воспалителни состојби, а го произведува шведскиот производител на лекови за ретки болести „Соби“.
Лекот ја намалува активноста на имунолошкиот систем, а неговата активна супстанција ја блокира активноста на хемискиот носач во имунолошкиот процес што доведува до воспаление.
„Се смета дека тој исто така може да помогне во намалување на воспалението и оштетувањето на ткивото поврзано со ковид-19“, соопшти ЕМА, додавајќи дека резултатот од анализата се очекува во октомври.