Минимални примања од 250 до 2000 денари или без воопшто приход, гласат пријавите на над 70 текстилни работници во земјава, кои упатиле поплаки и пријави до „Гласен текстилец“.
Претседателката, Кристина Ампева од посочи дека годинава е зголемен бројот на рабодотавци кои се охрабриле и воопшто да не го исплатат регресот за годишен одмор, а имаат и пријави од работници и во компании кои се членови на синдикатите.
„Имаме исплатено износ од 2000 денари и тоа го имаме во фирма во Делчево каде што се организирани во синдикат и воопшто не исплатен регрес во фирма во Скопје, која исто така е со членство во синдикат . Комапниите за жал ги користат аномалиите во колективниот договор, а кои со години се провлекува“, посочи Ампева.
Исто така, таа вели дека и на трудовиот инспекторат му се врзани рацете, зашто тие можат да реагираат само онаму каде што на работниците по овој основ не им е уплатен ниту денар.
„Таму се дава решение од страна на Државен трудов инспекторат. Обично тоа се рокови од 8 до 15 дена, па подоцна доколку работодавачот не го исплати регресот за годишен одмор во никаква сума, следуваат казни и слично, потенцира Ампева.
Ампева вели дека овој проблем се провлекува со години наназад, а работодавачите ја користат аномалијата од колективниот договор, која им овозможува минимална исплата и од 100 денари доколку фирмата работела со загуба.
„Моментално загубата во нашата држава е манипулација. Ние имаме работодавачи кои што во месец декември си купуваат, си го обновуваат сопствениот или личен возен парк и тоа го пријавуваат како загуба или како инвестиција. Не е загуба и не е инвестиција, ако си се подновите со ново „Бентли“ или нов „Туарег“ или не знам што“, посочи претседателката.
Таа забележа дека исплатата на К-15 мора да биде јасно прецизирана во новиот Закон за работни односи и да не се прави дискриминација меѓу приватен и јавен сектор.