Хантер Бајден, син на американскиот претседател Џозеф Бајден, тврди дека републиканските критичари на неговиот татко „се обидуваат да ја уништат претседателската функција“ со немилосрдни напади врз него и, како што изјави, „се обидуваат да го убијат“.
„Она што тие се обидуваат да го направат е дека се обидуваат да ме убијат, знаејќи дека ќе има поголема болка отколку што може да поднесе татко ми, и затоа ја уништуваат претседателската функција на тој начин“, му рекол Хантер Бајден на музичарот Моби во подкаст емитуван во петокот, јавува Би-Би-Си.
Републиканците претходно го обвинија американскиот претседател и неговиот син за трговија со влијание, но Белата куќа ги отфрли овие тврдења.
Интервјуто со Хантер во подкастот беше објавено еден ден откако американското Министерство за правда поднесе нова кривична пријава против Хантер Бајден, обвинувајќи го дека не платил 1,4 милиони долари данок, додека, како што стои во обвинението на американскиот суд во Калифорнија, потрошил милиони долари на луксузен начин на живот.
Обвиненијата поднесени во четвртокот следат по обвинението на 14 септември против помалиот Бајден поради лажење за употреба на дрога при пополнување на формулар за купување огнено оружје. Тој се изјасни за невин во тој случај.
Хантер Бајден, зависник од дрога, кој се опоравува, разговарал од својот дом во Малибу, Калифорнија со Моби, со кој се спријателил додека се опоравувал од злоупотреба на дрога и алкохол, јавува Би-Би-Си.
Фото: Teresa Kroeger