Претседателот на градската огранизација на СДСМ – Скопје, Васко Кичевски денеска порача дека се страшни и скандалозни заканите и навредите што произлегоа од кавгата меѓу лидерот на опозицијата, Христијан Мицкоски и градоначалничката Данела Арсовска.
-До пред само неколку месеци, ВМРО-ДПМНЕ за Арсовска зборуваше дека е најдобрата градоначалничка, дека е мајка на градот, а сега оваа партија бара доказ дека Арсовска е во добра психофизичка состојба. Начинот на комуникација меѓу Арсовска и Мицкоски покажува зошто ништо во Град Скопје не функционира, истакнува Кичевски.
Според него, СДСМ прави се за да ги реши проблемите на скопјани.
-Благодарение на одговорниот и чесен пристап на претседателот Ковачевски, блокадите на скопските улици се отстранети и дадена е шанса преку дијалог да дојдат до решение. Единствено во премиерот Ковачевски, граѓаните гледаат сериозен партнер и човек кој се грижи за нив. Скопје и неговите граѓани, не заслужуваат да бидат заложници на кавгите на Мицкоски и Арсовска, кажа Кичевски на прес-конференција во седиштето на СДСМ.
Од ВМРО-ДПМНЕ денеска соопштија дека „Арсовска само навредува, омаловажува, болно лаже или едноставно измислува, се однесува неурамнотежено“.
-Оттука јасно е дека ваква личност не може да извршува јавна функција и потребно е вештачење да се утврди дали Арсовска е во состојба да го води градот, побараа од најголемата опозициска партија.
Градоначалничката пред два дена обелодени дека имала закани од еден ист центар и посочи дека со истото се соочиле повеќе лица.
„Јас да, сум имала закани од Христијан Мицкоски и тоа конкретно, лично и директно. Кога ќе бидам премиер, ќе те влечеме по улиците, ќе го бришеме подот со тебе“, кажа Арсовска во гостување на дебатна емисија.