Хрватската компанија која развива нов екосистем на урбана мобилност денеска ја започнува првата од серијата фази на тестирање на системот за автономно возење во градот Загреб. Првата активност во таа фаза е собирање податоци за сообраќајот. За таа цел ќе се користат стандардни комерцијални возила опремени со напредна технологија потребна за мапирање на патиштата. Сообраќајните податоци како што се ширината на сообраќајните ленти, коловозите, сообраќајните знаци и други ознаки се неопходни за валидација на системот за автономно возење и калибрација на сензорите во сообраќајната средина во Загреб, објави компанијата.
Како што наведуваат, Project 3 Mobility (P3) во наредните месеци ќе спроведе бројни активности и тест фази на идната услуга P3. Во текот на овие фази, ќе се користат различни тест возила кои нема да изгледаат како последното возило што го развива P3.
За собирање податоци ќе се користат возила опремени со напредни сензори и технологија од Mobileye, партнер на Project 3 Mobility и глобален лидер во решенија за автономно возење, објави компанијата.
„Во P3 целосно сме фокусирани на лансирање на услугата за урбана мобилност што ја развиваме во Загреб како прв град. За да го постигнеме ова, во следните две години ќе спроведеме различни тестови на технологијата и нашите идни услуги на патиштата во Загреб, секогаш на многу безбеден и контролиран начин. Тоа е сложен и тежок процес кој се состои од неколку фази. Собирањето податоци и уличното мапирање е само еден од нив.
Сите овие активности се заеднички и неопходни со цел нашата услуга за урбана мобилност да биде безбедна за идните корисници и сите граѓани. Во оваа фаза на тестирање возилата нема да работат автономно, ниту тоа е нивна цел. Возилата се наменети исклучиво за собирање податоци за сообраќајната средина и инфраструктура, притоа почитувајќи ги највисоките стандарди за заштита на приватноста на учесниците во сообраќајот“, изјави Марко Пејковиќ, главен извршен директор на Project 3 Mobility.
За време на фазата на собирање податоци, возилата ќе ги возат квалификувани тест возачи ангажирани од Project 3 Mobility. „Нашата задача е многу јасна. Ние управуваме со возило за собирање податоци како и секое друго возило на нашите патишта. Системот се користи исклучиво за цели на собирање податоци“, вели Дарио Шамец, еден од квалификуваните тест возачи и инженери за собирање податоци. Возилата ќе кружат низ улиците на Загреб во однапред дефинирани зони. Првите активности ќе започнат на подрачјето на Нови Загреб.
Откако возилата ќе ја поминат првата дефинирана зона, се префрлаат во следната, додека не се обработат патиштата во сите дефинирани зони. Избраната област го опфаќа цел Загреб – од Подсљемен до Нови Загреб, од Подсушед – Врапча до Дубрава.
По оваа активност, Project 3 Mobility ќе започне уште една активност во оваа фаза на тестирање на технологијата за автономно возење. За ова ќе се користат различни тест возила од оние за мапирање и со нив ќе управуваат и возачи, а целта е да се демонстрира и тестира системот за автономно возење на улиците. Project 3 Mobility конкретно ќе ја објави оваа активност во наредните месеци.