Кремљ денеска соопшти дека ќе ги следи случувањата во Словачка откако партијата предводена од поранешниот премиер Роберт Фицо, кој вети дека ќе ја запре испораката на словачко оружје во Украина, победи на изборите во саботата.
Портпаролот на Кремљ, Дмитриј Песков, истакна дека Фицо допрва треба да се договори со другите партии за формирање коалиција и рече дека е смешно што европските политичари како него, кои ги ставаат потребите на својата земја на прво место, се етикетирани како проруски.
„Ова е апсурдно. Се разбира, би сакале да видиме поискусни политичари, поприсебни политичари, политичари кои имаат тенденција трезвено да ја проценуваат ситуацијата. Ќе видиме што ќе се случи понатаму“, рече Песков на редовниот брифинг во Кремљ, пренесе „Ројтерс“.
Запрашан за гласањето во американскиот Конгрес за нацрт-законот за привремено финансирање со кој се исфрли поддршката за Украина, Песков рече дека Вашингтон ќе остане вклучен во конфликтот, но Русија предвиде дека „заморот од конфликтот“ ќе расте во разни земји, вклучително и САД.