Лидерот на либанскиот Хезболах, Хасан Насрала, денеска во Бејрут се сретна со високите претставници на палестинскиот Хамас Салех ал-Арури и на Исламскиот џихад Зијад Наклех во екот на војната во Појасот Газа.
Во кратката изјава по состанокот се вели дека Насралах се договорил со Ал-Арури и Наклех за следните чекори на тројката заедно со другите организации поддржани од Иран во, како што се опишува, „чувствителниот момент“.
Нивната цел, според соопштението на либанската држава и медиумите на Хезболах, е да се постигне „вистинска победа на отпорот во Газа и Палестина“ и да се запре израелската „предавничка и брутална агресија против нашиот угнетен и непоколеблив народ во Газа и Западниот Брег“.
Други детали не се објавени.
Средбата се одржала во главниот град на Либан во време кога веќе три недели трае војната меѓу Израел и Хамас, исламската екстремистичка организација која владее со Газа.