Францускиот претседател Емануел Макрон му се закани на Косово дека од први јануари нема да биде дел од безвизниот режим доколку не се почитуваат договорите постигнати со Белград, јавуваат приштинските медиуми.
„Да бидам јасен, ви верувавме по прашањето за визите, тоа прашање беше суспендирано од Франција, бидејќи има врска со почитувањето на дадениот збор, а зборот не се одржа. Очекувам двете страни да се посветат на напредок. Ова е услов за мир во целата област“, рече Макрон на прес-конференцијата на која присуствуваше и албанскиот премиер Еди Рама.
Францускиот претседател рече дека очекува Косово и Србија да организираат избори на север со целосно учество на Србите на изборите и во институциите, а потоа да ја признаат Заедницата на општини со српско мнозинство на Косово.
Макрон очекува српскиот претседател Александар Вучиќ остро да го осуди нападот врз косовската полиција во Бањска на 24 септември.
„Очекувам Вучиќ да биде одговорен, а истото го очекувам и од косовскиот претседател и премиер“, рече Макрон.
Приштинска „Коха“ побара одговор од косовското министерство за надворешни работи, поради различни толкувања дека Франција веќе донела одлука за суспензија на безвизниот режим за Косово.
Одлуката за суспензија на визите за имателите на косовски пасоши се однесува само на Франција, а не и на целата Европска унија.
Европскиот парламент на 18 април донесе одлука да го поддржи укинувањето на визите за жителите на Косово. Истарските правила би важеле за нив, како и за сопствениците на српски пасоши, поточно дека во земјите на ЕУ можат да престојуваат без виза најмногу 90 дена.