Црна мечка во Колорадо застанала и позирала пред камера со сензор за движење стотици пати – и така се родиле изненадувачките селфи фотографии.
На една од камерите и се појавила муцката на околу 400 од 580 фотографии.
Повеќето од другите животни во природниот парк Болдер едноставно поминуваат покрај камерата, барајќи храна или засолниште. Но, не и оваа мечка.
Таа „посебно се заинтересирала“ за камерата и ја искористила „можноста“, соопшти управата на овој природен парк.
„Фотографиите не насмеаа, па решивме да ги споделиме со другите“, изјави портпаролот Филип Јејтс во соопштението.
Тие објавија неколку слики на Твитер, а новата селфи ѕвезда набрзо привлече големо внимание на социјалните мрежи.
Еден корисник на Твитер се пошегува: „Мислам дека изгледам добро од напред, но како изгледам од страна? Дали ми е предолга муцката?“
Во паркот од 46.000 хектари има 9 камери за детекција на движење. Тие се активираат секогаш кога некое животно ќе помине покрај нив.
Кога се активираат, камерите снимаат фотографија или краток клип.
Мечки, птици, лисици и бувови се само дел од животните фатени на камерата досега.
На овој начин, администрацијата сака да научи „како различни видови ја користат природата околу нас“ – а тоа вклучува и селфи од мечка – со „минимално човечко присуство во овие чувствителни живеалишта“.
Камерите биле поставени на местата каде што животните најмногу се движат, што било утврдено од трагите и патеките кои ги правеле при нивното движење.
„Овие камери ни помагаат да видиме кои животни се таму и што прават во текот на денови, недели, дури и години“, вели Кристијан Нунес, експерт за диви животни.