Додека ги броеше моментите до објавувањето на нејзината книга „Следниот ден“, Мелинда Френч Гејтс јасно стави до знаење дека не се зборува за помирување со нејзиниот поранешен сопруг, милијардерот Бил Гејтс.
Во ексклузивното интервју за Sunday Times, Мелинда откри детали за распадот на нејзиниот брак со Бил Гејтс, кој официјално заврши во 2021 година. Според неа, пресвртницата се случила во 2019 година, откако Њујорк Тајмс објави напис за поврзаноста на Бил со осудениот Џефри Епштајн.
„Написот покрена сериозни прашања за однесувањето на Бил – прашања кои сугерираат дека тој го предал не само нашиот брак, туку и нашите вредности“, напиша Мелинда во својата книга, нарекувајќи го Епштајн „олицетворение на злото“.
И покрај подоцнежните обиди на Бил да се дистанцира од Епштајн, штетата веќе беше направена. „Тоа беше нешто што беше неопходно“, рече Мелинда за разводот.
На прашањето за изјавата на Бил дека разводот е неговото најголемо животно жалење, Мелинда ладно одговорила: „Навистина не знам што да мислам на таа изјава. Затоа нема да го коментирам тоа што го кажува“.
Бил Гејтс на почетокот на оваа година рече: „Постои некое чудо да го поминете целиот свој возрасен живот со една личност поради спомените и длабочината на работите што сте ги правеле заедно и сте имале заедно деца. Кога се разведовме беше тешко и тогаш таа донесе одлука да ја напушти фондацијата – бев разочаран што ја избра таа опција да замине“.
Мелинда, сепак, има многу поинаков поглед на ситуацијата: „Тој има свој живот. Сега имам свој живот. Јас сум многу среќна“.
Двојката се разведе по 27 години брак, а нивната заедничка фондација, фондацијата Бил и Мелинда Гејтс, продолжува да работи, иако Мелинда повеќе не е активно вклучена во нејзината работа.