Во врска со овогодинешното одбележување на 70 години постоење, познатата француска автомобилска компанија Alpine претстави интересна електрична рели верзија која е базирана на неодамна претставениот спортски модел A290 и со себе ги носи сите елементи што се очекуваат од сериозен рели автомобил.
Компанијата, која е одговорна и за тркачките активности на Renault, нагласи дека A290 Rallye ќе биде достапен за клиентите пред крајот на годината, а Alpine ќе организира рели трки во кои, очекувано, ќе учествува само A290 Rallye.
Опремен со седишта Sabelt, безбедносни појаси, безбедносен кафез и систем за противпожарна заштита што ги исполнуваат тековните стандарди на FIA, A290 Rallye е напојуван од електричен мотор кој развива 223 КС. Силата се пренесува на предната оска, а зад белите 18-инчни бандажи (EVO Corse) со гуми Michelin, се наоѓа модифицирана суспензија зајакната со амортизери ALP Racing. Предните сопирачки дискови со дијаметар од 350 милиметри имаат шестклипни шепи, а задната оска има дискови со малку помал дијаметар. Исто така, има и хидраулична рачна сопирачка.
Електричниот мотор се напојува од батерија чиј капацитет (52 kWh) е ист како кај серискиот модел, а од Alpine велат дека ги рекалибрирале системите за пренос на моќност и контрола на тракцијата за трки. Инсталиран е и нов систем кој, во зависност од брзината на движење и притисокот на педалата за гас, е одговорен за соодветен звук во кабината.
Alpine бара 59.990 евра за A290 Rally, а цената вклучува повеќебојни апликации на сината каросерија.