Науру ќе ги прекине дипломатските односи со Тајван и ќе ја признае Кина, соопшти денеска владата на таа мала островска држава во Тихиот Океан. Со тоа Науру стана првиот дипломатски сојузник на Тајван кој застана на страната на Пекинг по претседателските избори одржани овој викенд.
Владата на Науру соопшти дека е „во најдобар интерес“ на земјата и нејзиниот народ да бара целосно обновување на дипломатските односи со Кина, пишува „Гардијан“.
„Ова значи дека Република Науру повеќе нема да го признава Тајван како посебна земја, туку како неотуѓив дел од кинеската територија и од овој ден ќе ги прекине ‘дипломатските односи’ со Тајван и повеќе нема да развива никакви службени односи со Тајван“, се вели во соопштението.
Потегот на Науру го остава Тајван со само 12 формални дипломатски сојузници, вклучувајќи ги Гватемала, Парагвај, Есватини, Палау и Маршалските Острови.
Кина тврди дека Тајван е нејзина територија без право на меѓудржавни врски, позиција која Тајван силно ја оспорува.
Тајванските безбедносни претставници изјавиле за новинската агенција „Ројтерс“ пред изборите во сабота дека Кина најверојатно ќе продолжи да ги омаловажува неколкуте земји кои имаат формални дипломатски врски со Тајван.
Лаи Чинг-те од владејачката Демократска напредна партија во Тајван победи на претседателските избори во саботата и ќе ја преземе функцијата на 20 мај. Кина пред изборите го нарече Лаи „опасен сепаратист“.