Актуелно
Почетна / Актуелно / Плакета за архимандрит Партениј од месната заедница на Галичник

Плакета за архимандрит Партениј од месната заедница на Галичник

Месната заедница од Галичник, му додели Плакета на игуменот на Бигорскиот манастир, архимандрит Партениј, во знак на голема благодарност за неговите несебични трудови и заложби за запазување на духот на Галичката свадба, како и за постојаната поддршка кон Галичани и кон галичките традиции.

Со голема почит признанието на архимандрит Партениј му го врачи претседателот на Месната заедница, Александар Костиќ.

-Месната заедница Галичник и организацискиот одбор на Галичката свадба, на Архимандрит Партениј од Бигорскиот Манастир му доделуваат плакета, во знак на благодарност за неговата постојана поддршка и заложби кон оваа манифестација, како и заради неговата огромна соработка и вложувањето напори за опстојувањето на овдешните традиции и заживувањето на чудесниот и древен мијачки крај, рече Костиќ при врачувањето на плакетата.

И годинешните младенци на Галичката свадба, Огнен и Марина ги венча архимандрит Партениј пред кого тие се заколнаа на вечна љубов пред Бога.

-Преку врските на љубовта треба да се учите на трпение. Јас ве замолувам и вас, мили Огнен и Марина, а и сите присутни овде, сите православни Христијани воопшто, да се напојувате од Светото Предание на христијанската вера, за браковите да траат докрај, та и нашето општество да биде здраво. Зашто темелите на едно здраво општество се наоѓаат токму во здравиот христијански брак. А ние во Црквата велиме: бракот е мала Црква, порача меѓу другото архимандрит Партениј на чинот на венчавањето.

loading...