Речиси пет милиони Украинци се регистрирани како бегалци низ Европа откако Русија ја започна својата инвазија пред помалку од четири месеци, соопштија во четвртокот Обединетите нации.
„Војната во Украина предизвика една од најголемите бегалски кризи“, изјави Високиот комесаријат на ОН за бегалци. Податоците покажуваат дека од 24 февруари досега вкупно 4.816.923 Украинци се регистрирани како бегалци во 44 европски земји.
Многу повеќе всушност ја напуштиле земјата, а податоците на УНХЦР покажуваат дека до 7-ми јуни биле регистрирани повеќе од 7,3 милиони гранични премини од Украина. Уште 2,3 милиони луѓе се вратиле во земјата, покажуваат податоците.
Според ОН, жените и децата сочинуваат 90 отсто од бегалците во странство, а мажите на возраст од 18 до 60 години ги исполнуваат условите за воена служба и не можат да ја напуштат Украина.