Оскаровецот Шон Пен (61) моментално е во Украина. Тој пристигна во Киев пред нападот на Путин. Кабинетот на претседателот на Украина потврди дека Пен дошол да го снима конфликтот во нивниот главен град.
– Оскаровецот Шон Пен пристигна во Украина. Тој дојде да ги сними актуелните настани и да му ја каже вистината на светот за руската инвазија на нашата земја. Пен е меѓу оние кои денес ја поддржуваат Украина во Украина. Нашата земја му е благодарна за неговата храброст и чесност, се вели во соопштението.
Оскаровецот го посети Кабинетот на претседателот и разговараше со вицепремиерката Ирина Верешчук, како и со локални новинари и припадници на украинската армија.
– Колку повеќе такви луѓе сега има кај нас, вистински пријатели на Украина, кои ја поддржуваат борбата за слобода, толку побрзо ќе биде можно да се запре рускиот предавнички напад – додаваат тие.
Да потсетиме, актерот ја посети Украина во ноември 2021 година, за да сними документарен филм за оваа земја.