Таткото на Тејлор Свифт е под истрага во Австралија за наводен напад на папараци во Сиднеј во вторникот рано наутро по нејзиниот последен концерт во градот. Инцидентот се случил кога Скот Свифт (71) наводно се нафрлил и го удрил 51-годишниот фотограф на фериботот додека Тејлор и нејзиниот татко се симнувале од луксузната јахта.
Според Sydney Morning Herald, ниту еден од двајцата мажи не е повреден. Бен Мекдоналд, извршен директор на Matrix Media Group, потврди за австралискиот весник дека тој бил тужителот и фотографот кој ги чекал Тејлор Свифт и нејзиниот татко кога пристигнале на пристаништето Neutral Bay по доцно ноќно крстарење при пристаништето. Тејлор во моментот на инцидентот влегувала во автомобил, пренесува ABC.
„Ја вршев работата бркајќи ја Тејлор. Таа штотуку се симна од јахтата во Neutral Bay и одеше по пристаништето со неколку чувари околу неа. Обезбедувањето сакаше да не оттурне со своите чадори, а потоа нејзиниот татко реши да се вклучи , и ме удри“, рече Мекдоналд за „Хералд“.
„Бев шокиран… Не требаше да биде така бидејќи обезбедувањето имаше се под контрола“, изјави Мекдоналд и додаде дека „сега случајот ќе и биде оставен на полицијата“.
Полицијата на Нов Јужен Велс потврди дека истрагата е во тек. „Две лица беа агресивни кон Тејлор туркајќи го нејзиното обезбедување и заканувајќи се дека ќе фрлат еден член на обезбедувањето во вода“, изјави претставник на поп-ѕвездата за TMZ.
Концертот на стадионот „Акор“ во Сиднеј е последниот дел од турнејата „Ерас“ на Свифт.