Виткоф и Кушнер ја посетија руската престолнина кон крајот на минатата година, кога преговорите за примирје со цел завршување на војната во Украина добиваа на интензитет, како и во јануари.
Виткоф, кој осум пати бил во Москва, се сретнал со рускиот претседател Владимир Путин. Сепак, ниту тој, ниту Кушнер никогаш официјално не го посетиле Киев. „Тоа е непочитување – да се доаѓа во Москва, а не во Киев, тоа е едноставно непочитување. Разбирам дека имаме сложена логистика. Ако не сакаат да дојдат, можеме да се сретнеме и во други држави“, изјави Зеленски во интервју за украински медиум, пренесува Би-Би-Си.
Во меѓувреме, како што пренесува „Индекс“, фокусот на меѓународната заедница се префрли од завршување на војната во Украина кон Блискиот Исток.
Виткоф и Кушнер требало да дојдат и во Киев, но поради војната со Иран, посетата била откажана.
Последниот трилатерален состанок меѓу Русија, САД и Украина се одржал во средината на февруари, а помалку од две недели потоа САД и Израел започнале напади врз Иран.
Виткоф и Кушнер сега се дел од американскиот преговарачки тим кој патува во Пакистан на разговори за примирје со Иран, а Зеленски призна дека вниманието на САД во моментов е насочено кон Блискиот Исток.
„Но во секој случај, за нас е важно да ја продолжиме соработката со Американците“, истакна Зеленски.