Ваква е моменталната атмосфера пред просториите на СПУКМ во центарот на Скопје, до студентскиот дом Кузман Јосифовски – Питу.
Местото каде вообичаено започнуваат протестите на „Шарената револуција“ (тука се наоѓа и СЈО), моментално е запоседнато од бројни полициски сили со оклопни возила.
Како што јавува репортерот на Либертас, ситуацијата и понатаму е напната, а актуелниот претседател на СПУКМ со истечен мандат, Кирил Спировски заедно со други лица се наоѓаат во просториите на организацијата, каде се заклучени веќе неколку часа и не излегуваат, ниту пуштаат некој внатре.
Надвор се наоѓаат студентите од Студентскиот пленум кои го повикуваат Спировски да излезе надвор и да објасни што се случува, како и каде се наоѓаат избирачките кутии кои беа насилно одземени, од лица кои, како што може да се види од објавите во медиумите воопшто не се студенти туку вработени во администрацијата, кои се поврзуваат со владејачката ВМРО-ДПМНЕ.
Вечерва од Студентскиот пленум упатија и Улатиматум до СПУКМ да ги поништи изборите. Тие упатија барање и до ДИК да провери што се случило со избирачките кутии кои се во нивна сопственост.
Фото – Либертас