Австралија во саботата потврди најголем број новозаразени оваа година, а позаразната делта варијанта на коронавирусот продолжува да се шири во најнаселените земји – Нов Јужен Велс (НЈВ), Викторија и Квинсленд, пишува Хина, повикувајќи се на Ројтерс.
Трите држави се дом на околу 15 милиони луѓе, околу 60 проценти од населението во Австралија и се во строг „локдаун“, а Австралија, исто така, потврди пет смртни случаи поврзани со Ковид.
Нов Јужен Велс потврди 319 нови локални случаи на коронавирус, најмногу од почетокот на пандемијата. Во Сиднеј и соседните регионални центри, декретот за останување дома важи веќе шест недели.
Во НЈВ, 345 лица беа хоспитализирани, 56 на интензивна нега и 23 на респиратор, рекоа државните власти.
Соседната држава Викторија го забележува најголемиот скок на инфекции во 2021 година со 29 нови случаи. Еднонеделно „заклучување“ стапи на сила во Викторија на почетокот на оваа недела.
Премиерот на Викторија, Ден Ендрјус, ги повика жителите да ги почитуваат правилата и да ги напуштат своите домови само за потребните работи, шопинг, вакцинација или двочасовно вежбање на отворено.
„Оваа варијанта се шири многу брзо“, рече Ендрјус. „Немаме доволно вакцинирани луѓе, ќе завршиме со помлади луѓе во болница, инаку фит и здрави луѓе. Нашиот систем ќе биде оптоварен ако не го ставиме ова под контрола“, додаде тој.
Во Квинсленд има 13 лица заразени, а само еден од нив не беше изолиран, што дава надеж дека осумдневниот „локдаун“ во делови од земјата ќе биде укинат во недела попладне, како што беше планирано.
Со повеќе од 36.000 случаи на КОВИД-19 и 937 мртви, Австралија избегна голем број заразени како во другите развиени земји, но бројот на вакцинирани е меѓу најниските.
Во Австралија, само 20 проценти од населението над 16 години е целосно вакцинирано.