Десет дена трае потрагата по исчезнатиот 31 годишен Македонец Мартин Јовановски, кој со своите пријатели беше повлечен од морските струите кај Посиди на првиот крак од Халкидики.
Неговиот брат Горан е дојден од САД со сопругата и 10 месечното дете за да се приклучи во потрагата.
Горан апелира до грчката влада повторно да помогне и да се вклучи во потрагата, бидејќи како што вели нивните финансиски средства како семејство се исцрпени бидејќи износот кој е потребен за ангажирање на сите пловни и воздушни средства се превисоки.
„За жал немаме никаков резултат, никаков знак. Заглавени сме во друга држава, но не можам дома да си заминам без брат ми. Не можам да ѝ кажам на мајка ми да се вратиме во татковината без него. Потрагата за мојот брат станува прескапа бидејќи се изнајмуваат чамци како и подводни дронови со термални камери“, вели Горан во изјава за грчки медиум и посочува дека донациите им се важни и без нив не би можеле ништо да направат.
Тој испрати апел и до локалното население ако може да се вклучи и да помогне во потрагата.