Српската премиерка Ана Брнабиќ изјави дека во односите меѓу Белград и Приштина улогите се однапред поделени во кои „Србија е постојано негативец, а Приштина е сиромашна немоќна сила која прави се што може и дека фактичката состојба нема никаква тежина во тоа.
Брнабиќ за ТВ Прва изјави дека за време на интервјуто на претседателот Александар Вучиќ за CNN, гледачите можеле да видат како „изгледа притисокот врз Србија“. Таа ја обвини и целата опозиција во Србија дека нема разлика меѓу она што го кажуваат и она што го кажува Приштина, кога се во прашање настаните на Косово.
Брнабиќ рече дека не го оправдува убиството на никого, дури ни убиството на албанскиот припадник на косовската полиција, но додаде дека „Србите на Косово трпат постојан притисок од властите“ во Приштина, поради што „прашање е на денови, прашање на минути кога ќе се случи инцидент“. „Не може постојано да се живее под таков терор“, рекла Брнабиќ, пренесува N1.
Од неа беше побарано да го коментира апсењето на Милан Радоичиќ, функционер на Српската листа до неодамна, осомничен за организирање на вооружен инцидент во кој на 24 септември во Бањска, северно Косово беа убиени косовски полицаец и тројца униформирани и вооружени Срби. Брнабиќ одговори: „Ова е правна држава и ќе направиме се што треба да направиме во согласност со законот и Уставот, ќе ги испитаме сите околности и ќе постапиме во согласност со нив“.
Таа, исто така, рече дека „мора да ги соберат сите докази и да ја одбранат апсолутната вистина“, пред седницата на Советот за безбедност на Обединетите нации за Косово закажана за 18 октомври. Таа, исто така, им рече на новинарите дека претставниците на Србија можат да ја зборуваат „само вистината бидејќи вистината ја штити позицијата на Србија“.
„Вистината нè штити. Ако овие другите беа заштитени со вистината, немаше да користат лаги и дезинформации. Точно е дека Албин Курти сака само етничко чистење на Косово и Метохија. Не сака Срби на Косово и Метохија. Не сака ниту Роми. И тоа никој не го спречува“, изјави Брнабиќ.
На прашањето за снимките од настаните во Бањска што ги прикажуваат властите во Приштина, Брнабиќ рече дека на нив се гледа и што било и што не, но не покажува како биле убиени тројцата Срби од Косово. „Дали ги убиле од далечина, во битка или ги убиле додека лежеле и веќе се предале и егзекутирани, што е спротивно на сите правила. Убедена сум дека постои и тоа видео“, изјави Брнабиќ.