Пратениците на Европскиот парламент ја повикаа Европската унија да го разгледа обемот на финансиската помош што и ја дава на Србија доколку, како што наведоа, оваа земја продолжи да ги поддржува антидемократските режими, пренесува Бета.
Во исто време, Европската комисија е поканета да обезбеди дека сите расходи на Унијата се целосно во согласност со стратешките цели и интереси на ЕУ.
Во извештајот усвоен од Комисијата за надворешна политика на Парламентот (АФЕТ), претставниците наведоа дека преговорите за пристапување во ЕУ со Србија треба да напредуваат само доколку таа земја ги почитува санкциите на ЕУ против Русија и ако направи значителен напредок во реформите поврзани со ЕУ.
Европратениците изјавија дека процесот на пристапување на Србија треба да се определи со напредок во владеењето на правото и основните права, функционирањето на демократските институции, посветеноста на споделување на европските права и вредности и нормализација на односите со Косово.
Нема „добар напредок“
Како што се наведува во соопштението на Европскиот парламент, во овој контекст, европратениците ја нагласуваат важноста од усогласување со Заедничката надворешна и безбедносна политика на ЕУ (CFSP), особено во однос на руската агресија врз Украина.
Европратениците констатираа дека од Извештајот на Европската комисија за Србија од 2020 година, оценките за состојбите во 33 поглавја од преговорите не се подобрени и дека во Извештајот за 2022 година не е постигнат „добар напредок“ во ниту едно поглавје.
Извештајот потсетува дека ЕУ е главен политички и економски партнер на Србија и најголем донатор и изразува загриженост поради неодамнешниот пад на јавната поддршка за членството на Србија во ЕУ.
Се оценува дека тоа е последица на долгогодишната анти-ЕУ/проруска политичка реторика која е широко распространета поради медиумите под контрола на Владата, како и владините претставници, но и поради неуспехот на функционерите да се соочат и да се помират со минатото на Србија.
Извештајот ги пофалува мерките што Србија ги презеде за зајакнување на независноста на судството и зголемување на транспарентноста и ефикасноста на институциите за владеење на правото. Се посочува и добрата соработка меѓу ЕУ и Србија во управувањето со нерегуларната миграција. Забележан е напредок во борбата против корупцијата, но се посочува дека се потребни повидливи напори и политичка волја за да се постигнат позначајни резултати, особено во случајот на сериозен и организиран криминал.
Нормализирањето на односите со Косово е приоритет
Кога станува збор за нормализацијата на односите меѓу Србија и Косово, тоа е приоритет и предуслов за пристапување и на Србија и на Косово во ЕУ, а европратениците ги повикуваат двете страни да покажат лидерство и да бидат подготвени за неопходните одлуки што водат кон напредок.
Тие бараат од Србија и Косово да се вклучат во дијалог во духот на компромисот со цел да се постигне сеопфатен, правно обврзувачки договор заснован на принципот на взаемно признавање во согласност со меѓународното право и без одлагање.
Известувачот за Србија, Владмир Билчик, рече дека извештајот содржи голем број критики и во исто време го поддржува патот на Србија кон ЕУ, на кој нејзините лидери се обврзаа по изборите во 2022 година.
„За да напредува, Србија мора да се усогласи со ЕУ во надворешните односи, да продолжи со реформите и да ги нормализира односите со Приштина. Доколку Белград го постигне тоа, тоа ќе биде заеднички европски успех“, посочи тој.
Европскиот парламент ќе гласа за извештајот на пленарна седница во мај, пренесува Бета.