Извршниот директор на Fisker, Хенрик Фискер, потврди за британскиот Auto Express дека шпекулираниот пик-ап Fisker ќе влезе во производство.
„Да, ќе направиме пик-ап. Ако Ferrari направи пик-ап, ќе беше како нашиот“, самоуверено изјави Фискер.
Американската компанија, која помина низ многу турбуленции од основањето во 2007 година, долго време работи на развој на пик-ап автомобили. Во минатото Хенрик Фискер тој проект го нарекуваше „Програма на Алјаска“, а веќе во 2020 година на социјалните мрежи беше објавена најавна слика.
Сепак, оттогаш нема никакви вести за проектот. Со оглед на тоа дека Fisker многу најавува, а малку испорачува, се претпоставуваше дека програмата „завршила во фиока“. Сепак, Фискер сега потврди дека пик-апот сепак треба да заживее, пренесува „Јутарњи“.
Споредбата со Ferrari е малку незгодна, бидејќи Fisker прави само целосно електрични автомобили, што Ferrari (се уште) ги нема. Иако електричен пик-ап звучи како лоша идеја во теорија, Американците се многу заинтересирани за овој тип на автомобили.
Ова возило, исто така, треба да биде „еколошки најодржливиот пик-ап на пазарот“. Слична цел имаат и со моделот Ocean, нов SUV кој неодамна излезе во продажба како „најодржлив автомобил во светот“.
Хенрик Фискер најави и голем број практични решенија поврзани со карго превозот. „Почекајте додека не видите некои од работите што ги смисливме, тие се навистина паметни“, рече Фискер.
Новиот пик-ап на Fisker најверојатно ќе сподели голем дел од својата технологија со Fisker Ocean, вклучувајќи ја и платформата FM29. Може да ја користи и својата голема батерија со нето капацитет од 106,5 kWh.
Сè уште нема информации каде ќе се произведува новиот пик-ап или кој ќе го произведува. Fisker нема сопствена фабрика, па моделот Ocean моментално се произведува во капацитетите на Magna Steyr во Грац, Австрија. Ова е голем проблем поради трошоците за превоз до САД, но и неможноста да се добијат стимулации во САД кои само субвенционираат купување возила од домашно производство.