Изгледаше како случаен коментар, обид да се мотивираат навивачите да го наполнат стадионот за денешниот натпревар против Саутемптон, и се покажа како сериозен конфликт што доведе до тоа Пеп Гвардиола да каже како може да го напушти клубот ако навивачите не го сторат тоа. За што се работи?
По натпреварот од Лигата на шампионите Манчестер Сити – РБ Лајпциг, шпанскиот стручњак рече дека на неговите момчиња им треба поголема поддршка за викендот, бидејќи ќе бидат уморни. Тој покажа отворено незадоволство од слабата посетеност (имаше околу 38.000 навивачи на трибините на „Етихад“; капацитетот е 55.000). Сепак, на овој „приговор“ одговори генералниот секретар на Здружението на навивачи на Манчестер Сити, Кевин Паркер.
– Пеп заработува околу 300.000 фунти неделно, нели? Тој може да земе дел од тие пари и да купи билети за нашите фанови. Јас не разбирам! Дали навистина мисли дека мотивирал некого да купи билет по тоа што го кажа, луто рече Паркер и продолжи: „Никој нема паричник без дно. Билетите се скапи, луѓето беа на одмор и немаат толку пари. И групната фаза во Лигата на шампионите може да биде малку здодевна. Тука, Лајпциг донесе само 100 навивачи“.
Гвардиола не молчеше по овие зборови …
– Да се извинам за ова што го кажав? Не, нема да го сторам тоа. Што реков погрешно? Дека ни треба поддршка? Јас само ги поканив луѓето да дојдат во поголем број и да уживаат во играта. Никогаш не прашав: А зошто не дојдовте? Г -дин Паркер може внимателно да го разгледа она што го кажав. Немам намера да се извинувам. Никогаш нема да имам проблем со моите обожаватели, во моментот кога ќе видам проблем – ќе заминам! Од првиот ден овде се обидувам да го правам најдоброто за клубот, посочи Каталонецот.
Кевин Паркер ја заврши оваа дискусија, барем засега.
– Разочаран сум од она што го слушнав од Пеп. Сето тоа беше непотребно и го одвлекува вниманието од натпреварите. Сакам да остане наш тренер, тој е најдобар на светот во својата работа. Затоа треба да се држи до својата работа – теренот, рече Паркер.
Сепак се чини дека ова нема да заврши тука…