Спектакуларна церемонија, посветена на мирот и обединувањето, даде старт на 23. Зимски олимписки игри во Појнгчанг, Јужна Кореја.
Отворањето започна точно во 12 часот по македонско време, а повеќе од 2.000 луѓе учествуваа во него.
Спектакуларното шоу покажа едно патување назад во времето на пет деца, кои ги симболизираат петте елементи на Земјата – оган, вода, дрво, метал и земја. По целиот пат, децата беа придружувани од белиот тигар Сухоранг, кој е една од двете маскоти на Игрите. Другата е Црната мечка – Бандаби.
Македонската делегација предводена од Ставре Јада продефилира на свеченото отварање. Покрај Јада, Македонија на ЗОИ 2018 ќе ја претставуваат Викторија Тодоровска во нордиско скијање и Антонио Ристевски во алпско скијање, кој третпат ќе учествува на зимски игри.
Во парадата се вклучија и спортистите на Русија, кои излегоа со олимпиското знаме. Тие немаат право да носат национални знамиња и симболи на татковината, а освен тоа при нивен успех нема да се слуша руската химна поради казната што МОК ја наложи на Русија поради големата шема со прикривање и манипулација на позитивни допинг примероци во Сочи 2014.
Обединетата екипа на Северна и Јужна Кореја помина низ парадата. Спортистите на двете страни продефилираа со знамето на Корејскиот полуостров, кој го носеа истовремено двајца спортисти – по еден од двете земји.
Historical moment as Korean athletes unite as one as they march into #PyeongChang2018
우리 선수들이 #2018평창 동계올림픽 개회식 선수 입장의 마지막을 장식했습니다. 감격적인 순간입니다!#OlympicTruce #Peace4me #평화올림픽 pic.twitter.com/p1G8tbf4W6— PyeongChang 2018 (@pyeongchang2018) February 9, 2018
Во Пјонгчанг ќе учествуваат вкупно 2.255 спортисти. За прв пат на најголемиот зимски спортски форум ќе има атлетичари од Малезија, Сингапур, Еквадор, Еритреја, Нигерија и Косово. Ќе има и од Северна Кореја, која ќе биде претставена од 22 спортисти.