Израелската армија објави дека и денеска на неколку часа го запира бомбардирањето на коридорот за евакуација и ги повика палестинските цивили да го искористат тој временски прозорец за да избегаат од северот на Појасот Газа на југ.
„Израелските сили ќе се воздржат од гаѓање на одредени области од 8 до 12 часот“, објави портпаролот на армијата Авичај Адраи на платформата X.
„За ваша безбедност, искористете го тоа кратко време за да преминете од северот на Газа кон југ“, додаде тој.
#عاجل 🔴 سكان مدينة غزة وشمالي القطاع, نناشدكم على مدار الأيام الأخيرة مغادرة مدينة غزة وشمالي القطاع والاتجاه إلى المنطقة الواقعة جنوبي وادي غزة حرصًا على سلامتكم. أبلغكم أن جيش الدفاع سيمتنع عن استهداف المحور المحدد بين الساعة 08:00 صباحًا ولغاية الساعة 12:00 ظهرًا. حرصًا على… pic.twitter.com/pmWoo2PVSe
— افيخاي ادرعي (@AvichayAdraee) October 16, 2023
Во друго соопштение, армијата соопшти дека назначила две рути за евакуација.
Израел ги повика жителите на северот на Газа, околу 1,1 милион луѓе од вкупно 2,4 милиони жители, да побегнат на југ, поради планираната операција за уништување на исламистичкото движење Хамас.
Израелската армија објави дека 600.000 луѓе заминале од север кон југ на Појасот, пренесе ДПА.
Повеќе од 1.400 луѓе беа убиени во напад на командосите на Хамас на 7 октомври во Израел.
Повеќе од 2.750 луѓе се убиени во Појасот Газа во израелските одмазднички напади, а 9.700 се ранети, според податоците на локалните власти.