Се формира нова коалиција која ќе настапи заедно на изборите. ГРОМ на Стевче Јакимовски, Интегра на Љупчо Ристовски и ПЦЕР на Самка Ибраимовски потпишаа заеднички договор и го промовираа слоганот на коалицијата „Храбро за Македонија“. Тројцата лидери велат дека се против уставните измени и внесување на Бугарите, без да се затвори целиот пакет на сите отворени прашања. Имаат заеднички став за надворешната политиката на земјата.
-Дали нашиот јазик е исконски, дали имаме посебна историја и дали нашите револуционери се Македонци по род и се бореле за македонско-национално ослободување и формирање на македонска држава на Блаканот…За овие прашања не се разговара и не се преговара. Македонија треба да биде дел од евроинтегративните процеси, но отфрламе отворање на нови прашања и услови кои не се поставени кон било која држава при патот кон ЕУ, рече првиот човек на ГРОМ и градоначалник на Карпош, Јакимовски.
Партиите заеднички одлучиле дека администрацијата е преголема и е во сервис на партиите. Предлагаат реформа и секој да работи каде што треба и за тоа што е образован.
-Никој да не седи дома, а да зема плата. Еден од приоритетите при коалицирање со останатите партии при евентуален влез во Влада исто така е и реформата во образованието, рече претседателот на ГРОМ.
Јакимовски вели дека „не се плашат од санкции и од никого“.
-Нема преговори за идентитет и не сме подготвени за изживување, додаде тој.
Ристовски изјави дека важна е слободата и дека мораме да имаме цврста армија и сигурен безбедносен систем. Според него, овој народ мора влезе во ЕУ со исправен рбет и гордо исправена глава.
-Доста е да не водат полтрони и партиски послушници. Доста е од неправда и од се што се кроеше од поголемите партии. Граѓаните се ставени како да нема друга опција. Самите да сфатиме дека излез и светлина на крајот од тунелот. Сакам нешто ново и да им дадеме шанса на чесни луѓе, рече меѓу другото претседателот ПЦЕР, Ибраимовски. Тој побара црвени линии за одредени важни прашања за државата.
-Народот бара трета опција. Дајте шанса да видите што можеме да направиме, додаде Ибраимовски.