Министерството за надворешни работи на Киргистан ги повика своите граѓани да го одложат несуштинското патување во Русија по терористичкиот напад во концертната сала во Москва, за кое се обвинети мигранти од Централна Азија.
Седум осомничени од Таџикистан и еден од Киргистан се уапсени и се во истражен притвор, пренесува Ројтерс.
Исламската држава ја презеде одговорноста за нападот и објави видео од масакрот, во кој загинаа најмалку 139 лица, а 182 беа ранети. Русија соопшти дека се сомнева оти Украина имала некаква врска со нападот што Киев категорично го негира.
Во соопштението објавено неделава, Министерството за надворешни работи на Киргистан ги повика граѓаните да ја посетат Русија само ако е потребно и, ако го прават тоа, постојано да ги поседуваат сите потребни документи и да ги почитуваат законските наредби на руската полиција.
Властите во соседен Узбекистан издадоа слични совети за сите граѓани на Узбекистан кои моментално се во Русија или планираат да одат таму, објавија локалните медиуми.