Над 22.000 евра штета од украдена електрична енергија открија екипите на Електродистрибуција при контрола во деловен комплекс на Попова Шапка. Акцијата била спроведена во координација со полицијата од СВР Тетово.
Контролата покажала дека електричната енергија се користела незаконски, преку кабловски разводен ормар, а бил поставен и директен приклучок со нисконапонски кабел. Со ваквиот начин, струјата се користела без да се евидентира потрошувачката.
„Констатирано е противправно користење на електрична енергија преку кабловски разводен ормар. Директно неовластено приклучување со нисконапонски кабел (4×16 mm2). Составен е Записник за неовластено користење. Поднесена е Пријава за неовластено преземање на електрична енергија до МВР според член 235-а од КЗ и изготвена е фактура за надомест на штета во износ од 1.361.599,00 денари“, информираа од „Електродистрибуција“.