Леброн Џејмс ќе биде неограничен слободен агент по крајот на сезоната, што моментално предизвикува бројни гласини за неговата иднина, особено предвид заладените односи со сопственикот на Кливленд, Дан Гилберт.
„ESPN“ налеа уште масло на огнот со информации дека Леброн би слушнал понуда од најголемиот ривал на Кавалирс во последните години – Голден Стејт.
Сличен трансфер е во сферата на научната фантастика, барем во моментот, но Џејмс дал индикации дека ако шампионите можат да ги ослободат потребните пари за неговата плата, ќе го чуе нивниот предлог, најмалку од почит.
Се очекува во текот на летото крилото да ја откаже клаузулата за сезоната 2018/2019, која во принцип би му донела плата од 35.6 милиони долари за уште една година во неговата матична држава Охајо. Трикратниот шампион на НБА ќе биде слободен агент по трет пат во својата кариера.
Во моментов, Голден Стејт плаќа најмногу за плати во целата лига – 135 милиони долари.