Здружението на граѓани „Совест“ од Охрид, денеска, најави дека ќе поднесе кривични пријави против сите субјекти инволвирани во реконструкцијата на Али-пашината џамија во центарот на градот.
Од Здружението посочуваат дека покрај нивните укажувања надлежните институции со непреземањето соодветни активности за спречување на нелегалните градежни активности стануваат соучеснци во криминални дејствија. Тоа произлегува од фактичката состојба на терен каде, според „Совест“ наместо реставрација и конзервациаја се извршуваат градежни рааботи за кои нема дозвола ниту една институција.
Тие го прозваа и министерот за култура Роберт Алаѓозовски, со зебелешка дека, иако јавно најави дека Министерствто ќе ги стопира градежните работи, до овој момент ништо не презел во таа насока.
Уште при првото појавување пред јавноста од Здружението „Совест“ реагираа на начинот на кој се врши реставрацијата на Али-пашината џамија во Охридската чаршија. Тие тогаш се произнесоа дека немаат ништо против конзервирањето на џамијата како објект од посебна историска важност заштитен со закон, но оти се спротивстававуваат на менувањето на изгледот на објектот, неговата околина, како и планот за изградба на 32-метарско минаре во центарот на Охрид.
Тогаш тие своите забелешки ги адресираа до сите надлежни институции очекувајќи од нив да не ја префрлаат одговорноста меѓу себе туку веднаш да преземат соодветни мерки согласно законската регулатива за исправање на состојбите и стопирање на сите градежни активности за кои нема дозвола.