Поранешниот потпретседател на Владата, Маријан Пакшу, од левичарската Социјалдемократска партија (ПСД), денеска изјави дека двете партии ги започнале „техничките“ подготовки за изработка на тој предлог, за кој веројатно ќе се расправа на почетокот на мај.
Министрите на ПСД минатата недела ја напуштија коалициската влада со Национално-либералната партија (ПНЛ) на Боложан, оставајќи го без мнозинство во Парламентот. Социјалдемократите повеќепати наведоа дека се подготвени повторно да се приклучат на истата проевропска група, но без Боложан на чело.
Боложан, кој одби да поднесе оставка, изјави дека Владата мора да спроведе важни реформи за да добие повеќе од 10 милијарди евра од фондовите на ЕУ за закрепнување и отпорност.
ПСД и АУР, двете најсилни партии, имаат 219 од 464 пратеници, а за изгласување недоверба на Владата им се потребни 233 гласа, кои би можеле да ги добијат од помалите десничарски партии.
Лидерот на АУР, Ѓорѓе Симион, изјави дека предлогот ќе биде поднесен штом ќе го потпишат 233 пратеници и дека гласањето би можело да биде на 5 мај. Тој истакна дека неговата партија е подготвена за разговори со сите откако Владата ќе биде соборена. На прашањето дали е можна владејачка коалиција со АУР, Пакшу само одговори дека „секое патување започнува со првиот чекор“.
По изборите во декември 2024 година, беше формирана широка проевропска коалициска влада со цел да се спротивстави на подемот на групата крајно десничарски партии. Меѓутоа, Боложан и левичарите повеќепати се спореа поради кратењето на буџетските трошоци со цел да се намали дефицитот, кој во 2024 година изнесуваше повеќе од девет отсто од бруто-домашниот производ (што беше највисоко во ЕУ), на 6,2 отсто за оваа година, пренесува Ројтерс.
ПНЛ тврди дека ПСД го прекршила договорот за соработка потпишан пред 10 месеци и дека нема да влезе во коалиција со нив. ПСД, без која не е можно проевропско парламентарно мнозинство, претходно го отфрлаше формирањето коалиција со ПНЛ, втората најголема партија во Парламентот, која според анкетите моментално води со околу 35 отсто поддршка.
Генералниот секретар на ПНЛ, Дан Мотреану, изјави дека ПСД со објавувањето на предлогот за изгласување недоверба на владата ја формализирала соработката со АУР. Мотреану на Фејсбук напиша дека лидерот на Социјалдемократите, Сорин Гриндеану, повеќепати рекол дека нема да соработува со АУР и дека „денешниот сојуз ги потврдува неговите постојани лаги“, пренесе романската агенција Agerpres.
Романија досега никогаш немала вонредни избори, а следните редовни парламентарни избори се предвидени за 2028 година.